Atxeritoko Baladarekin osatu du Pololoen trilogia Patxi Gallegok

Gaur aurkeztu du bere azken lana Patxi Gallego errenteriarrak

Donostiako Elkar aretoak hartu Patxi Gallegoren azken lanaren aurkezpena. "Nobela grafiko" gisa definitu du Xabier Mendiguren editoreak komikigile errenteriarraren lana eta horrekin osatu du Pololoak triologia.

Xabinaitorren balentriak bildu ditu Patxi Gallego komikigile errenteriarrak hirugarrenez eta berak adierazi duenez "eten bat behar dut orain, oso gustura egin dudan lana da, baina bizitzan hau baino gehiago da". 7 urte eman ditu guztira buru belarri komikigintzari lotuta, 2004. urtean Pololoak1- Poxpoliñen lurriña argitaratu zuenetik. 2006an iritsi zen Pololoak 2- Poxpoliñaren bahiketarekin eta gaur aurkeztu berri duenarekin triologia osatu du, aitortu badu ere triologia egitea ez zela izan bere asmoa.

Aurreko liburuen jarraipena ikus daiteke hirugarren honetan, baina baita berritasunak ere: istoria bera luzeagoa da, kolorea erabili du, eta Xabineitorrek berak lehenengo pertsonan egiten du kontaketa.
Patxi Gallegok liburuaren zain izan diren irakurle guztiei esker ona erakutsi nahi izan die gaurko aurkezpenean "nik idatzitakoa irakurtzeagatik, hori baita helburua, baina denok ez dugu zorte hori izaten, irakurleak izatearena alegia"

Atxeritoko baladan zertzelada soziologiko zorrotz bezain barregarriek dute lekua. Hirugarren liburu hau trilogiaren amaiera dugu eta baita bertan azaltzen diren pertsonaia maitagarri multzo baten agurra: Xabinaitor, Kariñe, Mari, Aldanondo eta Kortaja, Mayor Oreja eta bere sardinzarrak, Xabiren gurasoak eta batez ere Euskal Herriko poxpoliña guztiak.