Katixa Agirreren “Sua falta zaigu” liburua kalean

Katixa Agirre gasteiztarrak Sua falta zaigu izeneko lana aurkeztu du gaur goizean, Xabier Mendiguren eta Julen Gabiriaren konpainiarekin Bilboko Elkar Megadendan.
Bere lagun idazleengandik laudorioak baino ez ditu jaso Katixaren lan berri honek. Mendiguren harago joan da Katixa Agirre etorkizuneko euskal idazle handienetako bat izango dela adierazi duenean.
Julen Gabiriak lotsagabekeria eskatu dio hasberriari, aske idazteko eta ez kikiltzeko literaturaren mundu erraldoiaren aurrean. Ausarta izan behar du idazle hasberriak, eta halaxe jokatu du Katixak, ausardiaz eta maliziaz Sua falta zaigu izeneko lanean.
Gizakia interpretatzeko gaitasun itzela duela erakutsi du egileak. Giza-kondizioa ondo baino hobeto ezagutzen du eta batzuetan irakurleari barre egiten dio.
Zazpi ipuin bildu ditu lan honetan Katxiak eta zazpion azpian beste testu bat dagoelako sentsazioa hartuko du irakurleak, ezinegona berarengan sortuz.
Zazpi ipuinok denbora luzean idaztiak izan dira, baina hala ere, bakoitzak bere tokia hartu du modu naturalean liburuaren barruan, guztiok bide berbera egin baitute.
Ipuin guztiotako muinean sentimendu bat antzeman daiteke: insatisfakzioa, zerbait falta zaigulako sentsazioa, eta handik etorri da goiburua, Sua falta zaigu.
Liburu serio baten aurrean gaude, gizartearen barruak ondo ezagutzen dituen liburu baten aurrean, eta era berean, asunto hau barregarri uzten duena, izan ere, serio izatera jolasten duen gizartea oso barregarria da.
Lehenengo zigarrotik lehenbiziko ezkontzara, aurreneko desilusiotik zaputzaldian instalatzera, intentsitate bereziz jantzitako zazpi istorio ehundu ditu Katixa Agirrek bere estreinako narrazio-bilduma honetan, gaztaro mitifikatuaren muga lanbrotsuak heldutasun harrigarriz marraztuz.