Hamabost istorio, hamabost zauri ireki, ondu ditu Jaiok
Idazleak bere estraineko lana, ‘Hamabost zauri’, kaleratu berri du Elkarren eskutik

Alain LAISEKA / DONOSTIA

Karmele Jaio. Argazkia: A. GUERRERO

Edonork bere burua identifikatuta ikusteko moduko hamabost kontakizunez osatutako lana mamitu du Karmele Jaiok. “Hamabost zauri” (Elkar) liburuak komunikazio-inkomunikazio arazoak, bikoteen bakardadea edota eguneroko bizitzak sortzen dituen gorabeherak irudikatzen ditu. Tristura, mina, da nagusi istorio horietan; izan ere, zauriak irudikatzen baititu Jaiok, zabalik dauden zauri mingarriak.

Idazle gasteiztarraren estraineko liburuaren aurkezpena egin zuten atzo Donostian. Idazlearekin batera azaldu zen prentsaurrekora Elkarreko editore Xabier Mendiguren Elizegi, zeinak Jaiok idazteko agertzen dituen begirada zorrotza eta heldutasun hunkigarria azpimarratu zituen.

Idazlearen esanetan liburua osatzen duten hamabost ipuinek ezaugarri bat dute komunean: «Ipuin guztietan agertzen da zauriren bat. Norbaiti bizitzak edo egoera batek edo pertsona batek eragin dion zauria. Batzuk orbain bihurtu daitezkenak eta beste batzuk kronikoak direnak, baina ipuinotan denak agertzen dira irekita». Gasteiztar gazteak azaldu zuenez, «giza harremanetan ematen diren oztopo zailtasunak dira protagonistak. Askotan gure burutik pasatu baina esan gabe gelditzen diren hitz horiek barruan eragiten duten zauri hori azaltzen saiatu naiz, bai eta asperen baten atzean egon daitezkeen pentsamenduak irudi bihurtzen ere», azaldu zuen.

Hamabost istorio horietan bikoteak dira gehienetan protagonista. Jaiok bilatu gabeko emaitza izan da hori, «gertatzen dena da inkomunikazio-komunikazio arazo horien atzetik ibili naizela eta bikoteen harremanetan aurkitu dudala harrobi oso emankor bat», esan zuen.

Bikoteen arteko harremanetan guztiontzat ezagun diren sentimenduak islatu ditu Jaiok idazkera sinple eta zuzenaz. «Irakurleari oztopo gutxi jartzen saiatu naiz. Ez dut hitzekin malabarismorik egin, zentzu horretan da sinplea liburua», jakinarazi zuen Jaiok.